‘‘వారెవ్వా’’ బఫెట్‌.. ఏం చెప్పారు..

[:en]

మదుపు మారాజు చెప్పే మంచి సూక్తులు..

వారెన్‌ బఫెట్‌ చెప్తే ప్రపంచం చెవులప్పగించి వింటుందంటారు..

నిజమే..  

బఫెట్‌ అంటే ఒక బ్రాండ్‌..

ప్రపంచ ఇన్వెస్టర్లకు గురువైన బఫెట్‌ ఏమి మాట్లాడినా ఒక ఆణిముత్యమే.. 

ప్రపంచ ప్రసిద్ధ ఇన్వెస్టర్‌ వారెన్‌ బఫెట్‌ కంపెనీ బెర్క్‌షైర్‌ ఏజీఎం త్వరలో జరగనుంది.

ఈ సందర్భంగా వివిధ సందర్భాల్లో ఆయన చెప్పిన కీలక కొటేషన్స్‌ ఒకసారి చూద్దాం...
- కంపెనీ ఏ వ్యాపారం చేస్తుంది అన్నదే పెట్టుబడికి కీలక అంశమని వెల్లడించిన బఫెట్‌.. భవిష్యత్తులో ఈ వ్యాపారానికి ఉన్న అవకాశాలను అంచనావేయడం ద్వారా పెట్టుబడులను కొనసాగించాలని తెలియజేశారు. మార్కెట్‌ పడిపోయి ఉన్నప్పుడు నాణ్యమైన షేర్లను కొనడమే అత్యుత్తమ పెట్టుబడి.
- నలుగురి దోవలో నడవాలని ప్రయత్నించాల్సిన పనిలేదు. మార్కెట్లో అంతా భయపడేటప్పుడు మీరు ధైర్యంగా కొనండి.. అంతా ఎగబడి కొనేటప్పుడు భయపడండి(అంటే అమ్మేయండి).
- రూల్‌ నంబర్‌ 1: . ఎప్పుడూ నష్టపోకండి.రూల్‌ నంబర్‌ 2 :  ఎప్పుడూ రూల్‌ నెంబర్‌ 1ను మరువకండి.
- ఏంచేస్తున్నామో తెలియకుండా గుడ్డెద్దు చేలో పడ్డట్లు ప్రవర్తించడం వల్లనే రిస్కులు వస్తాయి. ఒక తప్పటడుగు మొత్తం జీవితాన్నే ముంచేస్తుంది.
- మీ కన్నా గొప్పవారితో కాలం గడపండి. జీవన విధానంలో, ఆర్జనలో, వ్యక్తిత్వంలో, మేధస్సులో మీకన్నా అధికులతో ఎక్కువ కాలం గడపడం మిమ్మల్ని సరైన మార్గంలో నడిపిస్తుంది.
- మంచి కంపెనీ షేరును అద్భుతమైన ధరకు కొనడం కన్నా అద్భుతమైన కంపెనీ షేరును మంచి ధరకు పట్టేయడం బెటర్‌..
- 20 ఏళ్లు సంపాదించిన గౌరవమర్యాదలు కోల్పోయేందుకు 5 నిమిషాలు పట్టదు. ఇది వంటపడితే ఇతరులతో మన ప్రవర్తన తీరే మారిపోతుంది.  మీ గౌరవాన్ని కాపాడుకోండి. సంఘంలో పరపతి కోల్పోతే, మీదగ్గర ఎంత డబ్బున్నా ఉపయోగం ఉండదు. ఒకసారి మీ పరువుమర్యాద కోల్పోతే తిరిగి సంపాదించడం చాలా కష్టమని గుర్తుంచుకోండి.
- నేను ధనవంతుణ్ని అవుతాననే విషయంపై ఒక్కసారికూడా సందేహపడలేదు.(అంటే మనపై మనకు నమ్మకం చాలా అవసరం అని అర్ధం.)
- ఒక వస్తువుకు మనం చెల్లించేది ధర, మనకు గిట్టేది విలువ. విలువను ఆధారంగా చేసుకొని ధరను నిర్ణయించుకోవాలి.
- మార్కెట్లు పదేళ్లు మూతపడ్డా ఏమీ కాని(పతనం కాని) కంపెనీల షేర్లను కొనాలి.(అంటే ఒడిదుడుకులతో ప్రభావితం కాని కంపెనీలని అర్దం.)
- నిజాయితీ అత్యంత ఖరీదైన వస్తువు. ఇతరుల నుంచి దాన్ని ఆశించకండి.
- ఇవాళ మీరొక చెట్టునీడలో ఉన్నారంటే గతంలో ఎవరో ఆ చెట్టును నాటబట్టేనని గుర్తించండి.
- వర్తమానంలో అనవసర వస్తువులను ఎడాపెడా కొనిపారేస్తే, భవిష్యత్‌లో అవసరమైన వస్తువులను అమ్ముకోవాల్సివస్తుందని గుర్తుంచుకోండి. ఇన్వెస్టర్‌ అంటే స్వల్ప అవకాశాలతో జీవితకాల రాబడి పొందేలా ఆలోచించాలి.
- ఒక షేరును అవసరమైతే కనీసం పదేళ్లు అట్టిపెట్టుకోలేమని భావిస్తే కనీసం పదినిమిషాల కోసమైనా కొనొద్దు. (  హోల్డింగ్‌ సమయం అనంతం అని ..అంటే మంచి లాభాలు వచ్చే వరకు వేచిచూడాలి అని అర్ధం).
- ఇతరులు మనకు ఆశ ఎక్కువ అంటారన్న భయంతో మనం ప్రేమించే పనిని చేయలేకపోవడం కన్నా పెద్ద శిక్ష ఇంకోటి ఉండదు. అనవసర మొహమాటాలకు గురికాకుండా, మీకవసరంలేని సందర్భాల్లో ‘నో’ చెప్పడం నేర్చుకోండి.
- జీవితంలో విజయవంతమైన వాళ్లు తమకు సంబంధం లేని విషయాలను దగ్గరకు రానివ్వరు. మనపై మనం నమ్మకం ఉంచడమే మనం పెట్టే అత్యంత కీలక పెట్టుబడి.
- మార్కెట్‌ పండితులు చెప్పేవి వంద శాతం నిజం కావాలని లేదు. ఎవరూ భవిష్యత్‌లో ఏమి జరుగుతుందో చెప్పలేరు. తెలివైన వాళ్లు ఆరంభిస్తారు, మూర్ఖులు అనుసరిస్తారని గుర్తించండి. ఒకరిని అనుసరించేకన్నా, మీదైన శైలిలో జీవితాన్ని ఆరంభించండి.
- రెండు పెట్టుబడి సాధనాలుంటే వేటిపై పన్ను తక్కువో గుర్తించి దాన్నే ఎంచుకోవాలి.
- అవకాశం తక్కువసార్లే తలుపుతడుతుంది. అందిపుచ్చుకోవడానికి రెడీగా ఉండాలి.కాలం, సమయాలను తెలివిగా వాడుకోండి. మీరు ఎందుకోసం కాలం వెచ్చిస్తున్నారో, ఎందులో మీ కష్టార్జితం ఉంచుతున్నారో క్షుణ్ణంగా అధ్యయనం చేసి ముందడుగు వేయండి.  బంగారు వాన కురుస్తుంటే దోసిట్లతో పట్టాలని చూడకూడదు, బక్కెట్‌తో నింపుకోవాలి.
- మీ గురించి, మీ నిర్ణయాల గురించి, మీ అవసరాల గురించి ఆలోచించుకునేందుకు సమయం కేటాయించండి. వ్యాపారంలో ముందు చూపు కన్నా, గతాన్ని గుర్తుంచుకోవడం అత్యవసరం. 

[:]